U mbajt trajnimi i dytë për trajnerë në kuadër të DIGITMAK: Drejt një qasjeje të integruar në mbështetjen e klientëve

Më 10 shtator 2026, në ambientet e Odës Ekonomike të Maqedonisë së Veriut në Shkup, u mbajt trajnimi i dytë për trajnerë në kuadër të DIGITMAK. Aktiviteti iu kushtua avancimit të njohurive dhe aftësive të profesionistëve të përfshirë në ofrimin e shërbimeve përmes DIGITMAK, me fokus në një qasje të përbashkët dhe të koordinuar për mbështetjen e klientëve.

Gjatë sesionit gjysmëditor, pjesëmarrësit u njohën me të gjithë procesin e mbështetjes së klientëve – nga kontakti i parë dhe identifikimi i nevojave, përmes vlerësimit të pjekurisë digjitale dhe përgatitjes së Udhërrëfyesit për digjitalizim (Digitalisation Roadmap), deri te përzgjedhja dhe ofrimi i shërbimeve të përshtatshme. Vëmendje e veçantë iu kushtua mënyrës se si shërbimet dhe ekspertiza e ndryshme brenda DIGITMAK mund të ndërlidhen në varësi të nevojave dhe prioriteteve konkrete të klientit.

Pjesa praktike përfshiu ushtrime dhe shembuj, përmes të cilëve pjesëmarrësit patën mundësi ta zbatonin këtë qasje dhe të shqyrtonin se si shërbimet e ndryshme mund të ndërlidhen gjatë procesit të mbështetjes. Gjithashtu, u diskutua për rolin e partnerëve, fushat e tyre të ekspertizës dhe mënyrën se si klientët mund të orientohen drejt mbështetjes shtesë më të përshtatshme.

U trajtua edhe çështja e vazhdimësisë së mbështetjes për klientët, përfshirë përdorimin e DIGITMAK CRM dhe mjeteve operative të përbashkëta. Në këtë mënyrë, mbështetja mund të vazhdojë edhe pas realizimit të një shërbimi, në përputhje me nevojat e mëtejshme të klientit.

Përmes prezantimeve, punës praktike dhe diskutimeve të përbashkëta, trajnimi kontribuoi në një kuptim më të mirë të mënyrës se si partnerët dhe shërbimet e tyre mund të ndërlidhen për të ofruar mbështetje më efikase dhe më gjithëpërfshirëse për kompanitë dhe organizatat.

Trajnimi i dytë përbën vazhdimësi të serisë së aktiviteteve që synojnë zhvillimin e vazhdueshëm të kapaciteteve të partnerëve të DIGITMAK dhe përmirësimin e cilësisë së shërbimeve për transformimin digjital.